ائل قیزی

آغلاما

بو دونیانین هم ائنی هم اوزونو،

من گورموشم فلکین هر اوزونو،

گل سؤیله ییم سنه سؤزون دوزونو،

دار گونونده چکیل دارا آغلاما !

باش اوجا اول ، باش اوجا ائت ائلینی ،

وار دولته چوخ باغلاما بئلینی ،

وطن ، ناموس بیرده آنا دیلینی

قورو ساخلا باشقا وارا آغلاما !

بو دونیا کی ، یوخدور اوندا اعتیبار ،

کوپ لرینده الوان- الوان رنگی وار !

بیری آغدیر بیری توتقون بیر تار !

سنین کی ده اولسا قارا آغلاما !

من دئمیره م طالع یازی یازارمیش

انسان اوغلو چوخ یازیلار پوزارمیش

کریم ، دونیا بیر گؤرمه لی بازارمیش !

یولون دوشسه بو بازارا آغلاما !

کریم گل اندام.

اورمو 1373

+ نوشته شده در 2008/7/22ساعت 5:31 PM توسط ائل قیزی |

چوخ یالواردیم

دئدیم ، اغیار ایله گزمه ، سنه چوخ یالواردیم ،

ایندی دینجل ، گوزلیم ، منده اولوب قوتاردیم .

بیر صداقتلی گوزل تاپمادیم عالمده ، غرض ،

بو آز عومروده چوخ اطرافی گزیب آختاردیم .

جان هانی منده ، منی عشق دیر ایندی یاشادان ،

اونو جانان منه وئرمیش دی ، یئنه قایتاردیم .

کونلوم آلداتدی منی حسنونه مه پاره لرین ،

سانمایین ، من بو وفاسیزلارا بئل باغلاردیم .

فله کین قدی بوکولموش سه ، من اوندان قوجایام ،

اونداکی ، یوخودو نه دونیا ، نه فلک ، من واردیم !

سنی من ایسته دییم گونلر اولوردوم سن سیز ،

عشقیمین سرینی کونلومده نهان ساخلاردیم .

واحیدم ، عشقده من ایندی ده ثابت قدمم ،

وارام اوز یاریم ایله من نئجه اول واردیم .

علی آقا واحید

+ نوشته شده در 2007/12/5ساعت 5:12 PM توسط ائل قیزی |

گئدیشین گتیردی...

گئدیشین گتیردی غمی ، غصه نی ،

قلبیم سئوه بیلمز داها کیمسه نی

هر گئجه رویامدا گورورم سنی ،

یوخومو آپارا بیلمه یه جک سن.

گئتدیین یوللارا حسرتله باخدیم،

دنیز تک کوکره ییب ، چای کیمی آخدیم.

منیمله قالاجاق بو قارا بختیم ،

بختیمی آپارا بیلمه یه جک سن.

گوناهین قارشینا چیخاجاق سنین ،

تنهالیق قلبینی سیخاجاق سنین ،

آهیم یاندیراجاق یاخاجاق سنی ،

آهیمی آپارا بیلمه یه جک سن.

گؤزومون یاشینی سیلسم ده بئله ،

سن سیز دردلی - دردلی گولسم ده بئله ،

من سنین دردیندن اؤلسم ده بئله

روحومو آپارا بیلمه یه جک سن...

نصرت کسمنلی

بایاتیلار

گمیم دریادا قالدی

ایشیم امدادا قالدی

اؤلمه یمه یانیرام

حییف یار یاددا قالدی

عزیزیم داشلی قالا

تورپاقی داشلی قالا

قورخورام دوشم اؤلم

یار گؤزو یاشلی قالا

+ نوشته شده در 2007/8/13ساعت 12:45 PM توسط ائل قیزی |

تاریخدا کیم قالاجاق

اونودلماز ستارخانلار

اونودولماز تاریخ یارادانلار

اونودولماز وطن اوچون چالیشانلار

تاریخی یاشامازلار !

تاریخی یار اد آلار !

تاریخی یار ادماغا ،

کیمی نین یاشی چاتماز !

کیمی نین باشی چاتماز !

تاریخی یاشا یا نلار

یا شا ییب اوتوب کئچر!

تاریخی یارادانلار ، بشریت نامینه

حیا تین آتیب کئچر !

ائله بونا گوره دیر ،

تاریخ، یاشایانین یوخ!

یارادانین آختاریر!!

دائم اونو حاقلاییر

آدین یاددا ساخلاییر!!

کریم گل اندام

اولو بابالاریمیز اتی چیی - چیی یئیرمیش !

اوولادیغی شکارین دری سینی گئیرمیش

بیزیم قوچاق ، دوزوملو ، مودروک آتالاریمیز

واقتیندا دویوشرمیش ، واقتیندا باریشارمیش

سوزو ، دیک - دیک دئیرمیش.

بس بیزندن بیلمیریک

نه سیاقدا دانیشاق

نه سیاقدا ووروشاق

نه سیاقدا باریشاق

ندنسه خمیریمیز بئله اولموش یو موشاق!؟

اوت کوکو اوسته بیتر

کوکسوز قالان اوت ایتر!!

کریم گل اندام

+ نوشته شده در 2007/8/2ساعت 11:55 AM توسط ائل قیزی |

گئتمه ترسا بالاسی

اذن وئر توي گئجه سي من ده سنه دايه گليم

ال قاتاندا سنه مشاطه ، تماشايه گليم

سن بو مهتاب گئجه سي سئيره چيخان بير سرو اول

اذن وئر ، من ده دالينجا سورونوب سايه گليم

منه ده باخدين او شهلا گوزونله ، من قارا گون

جرئتيم اولمادي بير كلمه تمنايه گليم

من جهنم ده ده باش ياسديقا قويسام سنيله

هئچ آييلمام كي دوروب جنت مآوايه گليم

ننه قارنيندادا سنله آكيز اولسيديم اگر

ايسته مزديم دوغولوب بيرده بو دونيايه گليم

سن ياتيب جنتي رؤياده گؤرنده گئجه لر

من ده جنتده قوش اوللام ، كي او رؤيايه گليم

قيتليغ ايللر ياغشي تك قورويوب گؤز ياشيميز

كوي عشقينده گرك بيرده مصلايه گليم

سن ده صحرايه مارال لار كيمي بير چيخ ، نولي كي

من ده بير صيده چيخانلار كيمي ، صحرايه گليم

آللاهيندان سن اگر قورخموييب ، اولسان ترسا

قورخورام من ده دؤنوب دين مسيحايه گليم

شيخ صنعان كيمي دونقوز اوتاريب ايللرجه

سني بير گؤرمك اچون معبد ترسايه گليم

يوخ صنم! آنلاماديم ، آنلاماديم ، حاشا من

بوراخيم مسجيديمي ، سنله كليسايه گليم!

گل چيخاق طور تجلايه ، سن اول جلوه ي طور

من ده موسي كيمي ، او طوره تجلايه گليم

شيردير (( شهريار )) ين شعري ، الينده شمشير

كيم دئيه ر من بئله بير سيرله دعوايه گليم؟

شهریار - آذر آيي 1353

+ نوشته شده در 2007/7/21ساعت 3:2 PM توسط ائل قیزی |

مرد اوغلو

كريم گل اندام 1326-نجي ايلده اورمو شهرينده آنادان اولوب 1352-نجي ايلده تهران حقوق فاكولته سين بيتيريب. اللي ياشينا دولدوغو حالدا دوغما آنا ديلينده بيرينجي كتابين چاپدان چيخاردير. 1341-نجي ايلده ياراديجيليق عالمينه قدم قويور.بو عزيز شاعير ايندي ده معمولي ياشايشينا ادامه وئرير.

مردلره نامرد اولماق ، آلچاقلارين ايشي دير!

آلچاقلاري اوجالتماق ،

يالتاقلارين ايشي دير.

يالتاقدان دوستلوق اومماق،

مايماقلارين ايشي دير.

مايماقلار اولماسايدي يالتاقلار ييغيلمازدي

يالتاقلار اولماسايدي

آلچاقلار يئر آلمازدي

آلچاقلار اولماسايدي

نامردلر دوغولمازدي!

نامردلر اولماسايدي

مرد ايگيد تانينمازدي!

بونونلا بئله سانماكي، مرد نامرده باغليدير،

دنيا نامردله دولسا ، مرد ائله مرد اوغلودور!

اولدوزلار آخار يانار

يار ، يارا باخار يانار

ديلده جرات اولماسا

گؤز باخيب ياخار يانار

ايللر آچيلدي گئتدي

آيلار تؤكولدو گئتدي

بير گون گلدي گنج ليگيم

اوزومه گولدو گئتدي

بير طرفده كائنات

بير طرفده يئر، حيات

قورولوبدور بو شاهمات

يئر گويلري ائدير مات

كريم گل اندام

+ نوشته شده در 2007/7/9ساعت 2:37 PM توسط ائل قیزی |

بابکیم

ئيرمي اوچ ايل قاراداغ زيروه لرينده

قارتال كيمي يووا قوردو بابكيم

وحشي معتصمين برابرينده

پولاد قيلينجيني ووردو بابكيم

نه هارون نه مآمون نه ده معتصم

شيرين يوخويا گتمدي دئسه م

سيوريلميش قلنجي الينده محكم

گوزلري اونونده دوردو بابكيم

خلافت اوردوسو هاردا داياندي

يانديرديقي اودون ايچينده ياندي

بورا اودلار يوردو آذبايجاندي

گلن اوردولاري يوردو بابكيم

دمير قالا كيمي يئرينده قالدي

ايپك دومان كيمي گويه اوجالدي

چوخلو سركرده لر كمنده سالدي

سايمادي خلافت اوردو بابكيم

سايمادي كسك دي چنقلدي داشدي

يئل كيم كوكردي سئل كيمي داشدي

دره دن شيغيدي تپه دن آشدي

قولدورلار بوينونو بوردو بابكيم

سنباط دوستو ساتدي هئش ده دورمادي

اولوب گئتدي چوخدا اوزون يورمادي

خائين افشين حقيقتي گورمه دي

هله ده افشين لر كوردو بابكيم

اوزونو چوخ سالدي آتشه كوزه

ئيرمي اوچ ايل يوخوسو گلمدي گوزه

نئچه يول افشين له گلدي اوز اوزه

افشينين آغزيندان ووردو بابكيم

خليفه يانيندا يوز قارا واشي

فيرلاندي گوزلري اوينادي قاشي

چاپيلسين قوللاري كسلسين باشي

ئيلمز بذ كيمي دوردو بابكيم

اوجا زيروه لرددن باخير قالاسي

دوشمانلار يانديريب ياخير قالاسي

قوچاقلار توره در آخر قالاسي

منم دئيه نلره زوردو بابكيم

گويلره باش چكه ن بذ قالاسيدي

بير قوجا قارتالين بوش يوواسيدي

او اؤلمه ز بير خالقين اوز بالاسيدي

بلكه گئنه بوساط قوردو بابكيم

خليفه حيرتله باخدي اوزونه

دئدي يالوار منه آخ ده اوزونه

توكولن قانيني ياخدي اوزونه

داغلارين قافلاني قوردو بابكيم

هدر اولماياجاق او قانلار اينان

قاينايب جوشاجاق اوتدوكجه زامان

ائليني ساتمادي شانلي قهرمان

خزردي آرازدي كوردو بابكيم

داغلاري تيتردي نفرلر سه سي

داشلارا سس سالدي آتلار شيهه سي

غفارلا گول اندام ائلدي بحثي

يانديران آلوودو قوردو بابكيم

غفار ابراهيمي

+ نوشته شده در 2007/7/2ساعت 12:7 PM توسط ائل قیزی |

هر شام تا سحر

خورشيد بانوناتوان آذربايجان كلاسيك ادبياتي نين ان گؤركملي نماينده لريندن بيرسي دير. اونون يازيچي و شاعيرلره ائتديكي يارديملار و ادبياتيميز انكشافي اوغروندا آتديغي آدديملار و آچديغي ((انس مجلسي)) آدلي ادبي محفل ين اوندولماز خاطيرسي ادبيات تاريخيميزده سؤنمز و پارلاق اولدوز كيمي پارلاياجاقدير.خورشيد بانو ناتوان خانيمين آتاسي مهدي قلي خان قره باغين سؤن حاكيمي و اناسي بدري جهان بيگم گنجه خاني جوادخانين نوه سي ايدي. خورشيدبانو ميلادي ايلي 1832- اينجي ايلين اوگوست آيي نين 15-اينجي گونونده شاعرلر شهري اولان شوشادا آنادان اولموشدور.ائل آراسيندا (( خان قيزي )) ائو آراسيندا (( در يكتا )) آدلانارميش.خورشيد بانو 13 ياشيندا آتاسيني الده ن وئرير و بير آز مدت اونان سورابعضي مسئله لره گوره خورشيد بانو مجبور اولور كي خاساي خان(چنگيز خانين نوه سي و روس دولتينين نفوذلي شخصيتلرينن بيري)ازدواج اله سين كي بو ازدواجين نتيجه سينده خورشيد بانو بير اوغلان ( مهدي قلي خان وفا) و بير قيزا(خان بيكه ) صاحيب اولور. 18660 اينجي ايلده خاساي خان اوزون اولدورور كي او اولنه ن سورا خورشيدبانو بعضي تهمت لرده ن اوزاق قالماق اوچون1869.اونجو ايلده سيد حسين آغا ايله ازدواج ايله يير كي بو سيد حسينن ده بير قيز و ايكي اوغلانا صاحيب اولور.ناتوان خانيمين شعرلرين دؤرد حصه يه بؤلمك اولار:

۱.كلاسيك سبكينده يازيليديغي شعرلر

۲.اؤز ياشايشيله علاقه دار خصوصا ايكي اوغلونا حصر اولموش شعرلر

3.طبيعت گؤزلليكلرين تصوير ائدن شعرلر

4.معاصرلرينه يازديغي مكتوبلاردان عبارت اولان شعرلر

بيزيم بو عزيز شاعيريميز 1987-اينجي ايلين اكتبر آيي نين بيرينجي گونو وفات ائدير و اونون جنازه سي آغير ماتم ايچينده آغ دامين ((عمارت))قبرستانينا منتقل اولوب گونشي قارا توپراقلارا تاپيشيرديلار.

اي اهل دل فناني قويون باري آغلاتسين

اغياره چونكي يار اولوب ياري آغلاسين

منع ائتمك عاشقي نه روا آه و زاردان؟

چون دردي وار قويون كي سيزي تاري آغلاسين

گيزلين خيالي واركي بيله آه و زار ائدر

ئوز حالينه قويون بو دل افكاري آغلاسين

بولبول نواسي بي سبب اولماز بوباغدا

گؤر دوكجه هر زمان گول ايله خاري آغلاسين

هجران يار اولدي سبب آغلاماغينا

يا رب گؤروم هميشه سبب كاري آغلاسين

ويرسين اليله باشينا هر شام تا سحر

ياره ، غم ايچره اولمادي غمخواري آغلاسين

شام فراغيده قاليبسان زار و خسته حال

سالديقجا ياده اول مه رخساي آغلاسين

سسلندي ناتوانه كي ارباب غم تمام

حال فنايه جمع اولوب ائلجاري آغلاسين

خورشید بانو ناتوان

+ نوشته شده در 2007/6/19ساعت 2:40 PM توسط ائل قیزی |

چاغیریر

عزیز دوستلار خردادین ۲۴

قدر بو وبلاگین شعرلری

تازالانمیاجاق.

آی کلبجر ائلی غیرت واختیدیر

وطن اوغول دئییب سیزی چاغیریر.

(( یانیق کرمی ))یه بورونوب قالان

او دده شمشیرین سازی چاغیریر.

نغمه دونوب بولاق لارین دیلینده

رنگی سولوب چیچه یینده گولون ده

دوشمن قوجاغیندا دوشمن الینده

چیرپینان گلینی قیزی چاغیریر.

درلری سایمایاق دردیمیز چوخدو

شجاعت چاتییدی انتقام واختی!

بیزیم دایانماغا حاققیمیز یوخدو

تک قالان مزارلار بیزی چاغیریر.

شجاعت

+ نوشته شده در 2007/5/17ساعت 8:24 PM توسط ائل قیزی |

نه واركي

چاليش كي، هر واختي خوش كئچيره سن

واخت اؤتوب كئچه جك واختا نه واركي.

چوخ دا بئل باغلاما طالعه - باختا

طالعه نه واركي ، باختا نه واركي.

                                  گيلئي نه لازيمدير وعده ده ن واختان

                                  صدقه گؤزلمه طالعده ن ، باختان

                                  تاختين نه وئجينه سن دوشدون تاختان

                                  اؤزگه سي چيخاجاق تاختا نه واركي.

دالدالان اوغورسوز اسن كوله كده ن

آستاري شيطاندان اوزو ملكده ن

كئچير شده رده ن ، اله الكده ن

((بهمن))ين سؤزونده ساختا نه واركي.

                                                        بهمن وطن اوغلو

+ نوشته شده در 2007/5/1ساعت 11:10 AM توسط ائل قیزی |